НОВИ САД – Схадзка Координациї националних совитох (НС-ох) националних меншинох у Сербиї отримана вчера, 20. юния у Новим Садзе, а медзи найважнєйшима темами на сходзе, хтори бул у шедзиску Националного совиту Словацох, бул вибор нового предсидательства и проблеми у витворйованю права на школованє на мацеринским язику.
Предсидатель Координациї НС-ох шлїдуюци рок будзе др Сулейман Уґлянин, предсидатель Бошняцкого НС, а заменїк предсидателя Єне Гайнал, предсидатель НС Мадярох.
Понеже єднорочни мандат дотерашнєй предсидательки Координациї Ани Томановей Макановей закончени медзи двома зашеданями, по дотерашнєй пракси, предсидательство припада националному совиту хтори дотераз мал заменїка предсидателя, а то Национални совит Бошнякох.
На схадзки присуствовал и предсидатель НС Руснацох Славко Рац, и векшина представительох НС-ох на вчерайшим сходзе потримала предкладанє же би заменїцке место припадло НС Мадярох, цо значи же шлїдуюци предсидатель Координациї будзе з тей заєднїци.
Координация розправяла и о вецей питаньох зоз законскей реґулативи у обласци меншинских правох, як и о перспективох за їх унапредзованє, насампредз у рамикох розправи о Поглавю 23.
Як окреме актуална тема надрилєл ше проблем анкетованя школярох и родичох о виборе ученя мацеринского язика, понеже ше указало же тот поступок анї з другого разу нє окончени на правилни способ, цо барз очежа сполньованє того права у наступним школским року. То би мала буц главна тема шлїдуюцей схадзки Координациї, хтора будзе отримана медзи 10. и 15. юлийом, найскорей у Новим Пазаре.