БАЧИНЦИ – У рамикох 25. манифестациї Днї Миколи М. Кочиша у Церковней сали у Бачинцох вчера представена фото-моноґрафия Дюру Лїкара „Миклошевци под сримским нєбом”, як и други Лїкарово кнїжки о Миклошевцох.
Слово о дзешатей кнїжки спомнутого автора, а видата є з нагоди 165-рочнїци приселєня Руснацох до Миклошевцох и обсяжно дава препатрунок живота у прешлосци и терашньосци Руснацох у тей часци Сриму.
Кратки виривок з найновшей кнїшжки пречитал сам автор, як и його нєвеста Ксения Лїкар, а виривок з рецензиї пречитала авторова супруга, учителька у пензиї Ксения Лїкар.
Дюра Лїкар з тей нагоди представел и други свойо кнїжки, як цо то о Фодбалским клубу „Русин” з Миклошевцох, о школстве у тим валалє, хтора обявена з нагоди отвераня новей школи и 155-рочнїци школства у Миклошевцох, потим „Най ше нє забудзе” – о Руснацох у шицких парохийох у Горватскей, „Миклошевски блїскавки”, у хторей Дюра лїкар пише о миклошевских културних манифестацийох, та „Колїше ше жито класате” и други.
Заступнїк Дружтва за руски язик, литературу и културу Ирина Папуґа, у мено орґанизатора Дньох Миколи М. Кочиша представела найновиши виданя Дружтва, хтори потим придала присутним, а Дюра Лїкар три прикладнїки фото-моноґрафиї „Руснаци под сримским нєбом” и други кнїжки, бачинскому парохови о. Даркови Рацови подаровал за парохийну библиотеку.
