Тогорочна манифестация „Керестурски саям 2016 ”, будзе отримана у термину Фестивалу култури „Червена ружа” 25. юния, у Майсторским доме, а представи ше стари ремесла зоз демонстрованьом дзепоєдних роботних операцийох хтори прикажу дакедишнї майстрове.
У рамикох тогорочней манифестациї „Керестурски саям 2016 ” того року буду представени и стари ремесла зоз демонстрованьом дзепоєдних роботних операцийох, хтори поробя дакедишнї майстрове, а нєшка пензионере и почесни члени рускокерестурского Здруженя ремеселнїкох и приватних привреднїкох, хторе орґанизатор Сайма.
За тоту идею найзаслужнєйши майстор колєсар Михайло Надь, хтори обдумал тоту инициятиву.
– Новинарка нашей рускей редакциї Телевизиї Златка Перовичова нєдавно ми предложела же би ше як документарни материял могло зняц тот стародавни способ роботи у моїм колєсарским ремеслу. Попачело ше ми тото, алє сом подумал же би то зробиц и за други ремесла за хторих ище маме живих майстрох, бо би ше так голєм зачувало як випатрала майсторска робота без сучасних машинох и як ше ручно вирабяло предмети – толкує майстор Михал.
У медзичаше идея ше преширела же би ше демонстрацию старих ремеслох указало ширшому кругу людзох на даякей валалскей манифестациї, та було лоґичне же би то було на Керестурским сайме.
Майстра Надя потримали колеґове, та настал мали орґанизацийни одбор за тото подняце ґу хторому ше приключели тишлїр (столар) Яким Грубеня, коваль Яким Канюх, колєсаре Владо Малацко, Яким Пап и Яким Кренїцки. Тих дньох вони обдумую шицко цо потребне же би ше, поведзме, могло приказац як колєсаре нацаговали шини на колєса, и подобне. Зазберує ше старих алат и нащивює стари мигелї и їх майстрох хтори би ше уключели до того подняца. Одбор их и на таки способ поволує же би ше явели дакому з нїх, або майстрови Надьови (тел. 703-880, моб.062/17-89-131).
Демонстрация старих ремеслох будзе отримана у дворе Майсторского дома, дзе будзе отримани и сам тогорочни Керестурски саям, а у термину отримованя Фестивалу култури „Червена ружа”, 25. юния.