БЕОҐРАД – Анґажованє роботнїкох прейґ аґенцийох, ткв. „на лизинґ”, у Сербиї вше заступенше, а понеже є нє реґуловане зоз законом, коло 70 000 роботнїки робя у шивей зони. Прето, по углядзе на розвитши держави, и у нас пошвидко будзе принєшени закон хтори ше будзе одношиц на анґажованє роботнїкох прейґ аґенцийох за обезпечованє роботи, наявел премиєр Сербиї Александар Вучич.
На тексту закона ше уж длуго роби, а роботну ґрупу хтора пририхтує предлог творя представителє синдикатох и Униї роботодавательох, представителє министерствох роботи и привреди, Националней служби за обезпечованє роботи, Заводу за статистику, фондох, Управи за безпечносц на роботи, Инспекциї роботи, младежских задруґох и трох найвекших аґенцийох за обезпечованє роботи у Сербиї.
Закон би мал обезпечиц же би роботнїк котри достава роботу прейґ аґенциї з ню мал подписани контракт на одредзени, лебо нєодредзени час и условия роботи єднаки як и роботнїки котри нє анґажовани прейґ аґенциї. Роботнїком ше муши обезпечиц и синдикалне орґанизованє.
Ґу тому, роби ше и на реґулованю того же на хтори роботни места мож анґажовац роботнїкох прейґ аґенцийох, а то би нє требали буц роботни места хтори предвидзую векши ризик, лєбо роботи хтори подрозумюю бенефицировани роботни стаж.