РУСКИ КЕРЕСТУР – Як у шицких oсновних школох у Сербиї, так и у ОШ „Петро Кузмяк” вчера и нєшка днї предвидзени за жалби на 19. юния обявени прелиминарни резултати Закончуюцого испиту за маломатурантох.
Як Рутенпрес дознава у управи керестурскей Школи, резултати тестох, хтори ту виполньовали 36-еро маломатуранти, начално могли буц лєпши, понеже школяре мали надосц пририхтуюци годзини орґанизовани у Школи.
Штреднє число посцигнутих бодох (з можлївих 20) виноши 8,08 з мацеринского- руского язика; 6,47 з математики, а 8,96 з комбинованого тесту. Поєдинєчно, з руского язика максимално посцигнути 15, з математики 17, а з комбинованого тесту 15,5 боди.
Нєт анї єдного школяра же з мацеринского язика и комбинованого тесту мал нула боди, а з математики нула боди мали двойо школяре.
Конєчни резултати и обраховани боди Закончуюцого испиту на уровню держави буду познати 24. юния, а потим, 25. и 26. юния, осмаки буду виполньовац лїстини жаданьох за упис до вибраних штреднїх школох.