БЕОҐРАД – Шлїдом информацийох же премиї за млєко буду утаргнути, представителє Здруженя продуковательох млєка Сербиї отримали схадзку з представителями Министерства польопривреди, одкаль поручене же слово о дезинформациї.
– На терену ше бешедує же премия за млєко, хтора тераз седем динари, будзе утаргнута. Вона нє будзе утаргнута. У вименкох и дополнєньох Закона о стимулох пише же премия будзе до седем динари и нє будзе зменшована – гварел помоцнїк министра польопривреди и защити животного штредку Ненад Катанич.
Покраїнски секретар за польопривреду Бранислав Боґарошки тих дньох реаґовал на вименки, понеже предвидзую же премиї нє буду заґарантовани седем динари, алє до седем динари.
Предсидатель Здруженя продуковательох млєка Сербиї Любиша Йованович гварел же их з Министерства прешвечовали же ше аґрарни буджет нє будзе меняц, та анї премиї за млєко.
– Сцеме же би премия за млєко остала минимално седем динари за млєко екстра класи, а предкладаме же би була аж и звекшана на осем, лєбо дзевец динари – гварел Йованович.