РУСКИ КЕРЕСТУР – Штредньошколске насилство, хторе у рижних формох заступене у шицких дружтвох, тема театралней представи „Врацим ше по вашо души“, чия премиєра отримана всоботу, 14. марца у Велькей сали керестурского Дому култури. Представу режирал Владимир Надь Ачим, по мотивох роману Стивена Кинґа и горор- филму Лоренса Дикоена „Кери“, а ґлумели млади з Драмского студия „Арт“ Дому култури.
Приповедка провадзи преживйованє штредньошколских дньох дзивки Кери Вайт (ґлуми ю Адриана Надь), котра ма нєзвичайну моц телекинези. Вишмейованє парнякох, та мац – вирски фанатик, одражує ше на Керийову нєсиґурносц, а кед була поволана на матурски вечар, думала же є конєчно прилапена у дружтве. Медзитим, знова є вишмеяна, а за страшне вимсценє над тима котри ю поштредно, лєбо нєпоштредно повредзели, похасновала свойо надзвичайни моци.
Представа здогадує на америцки тинейджерски филми у хторих постої радикалне подзелєнє медзи популарнима и нєпопуларнима штредньошколцами. Пре скромни условия у хторих ше робело представу, за творенє атмосфери горору заслужни звучни ефекти, а сама дїя, односно даєдни сцени чежки за адаптованє и виводзенє у театру, та приповедку нє могло у подполносци пренєсц публики и охабиц прави упечаток горору.
Попри спомнутей Адриани, ґлумецку екипу творя ище 12-ецеро млади: Саня Николич, Ребека Планчак, Силвия Малацко, Борис Барна, Андрей Орос, Андреа Костелник, Никола Сивч, Лидия Костелник, Валентина Колошняї, Валентина Биркаш, Соня Сабадош и Борис Орос.
