ВЕРБАС – Пред полну салу з публику, у КПД „Карпати” у Вербаше вчера вечар премиєрно виведзена представа „Як забиц предсидателя” Миру Ґаврана, у режиї Владимира Надя Ачима. Представу Руски народни театер (РНТ) „Петро Ризнич Дядя” витворел у копродукциї з вербаским КПД „Карпати”, а з финансийну потримовку Националного совиту Руснацох.
Ґлумци з Вербасу – Нада и Янко Лендєрово и Юлиян Медєши, та Танита Ходак з Коцура ше добре знашли у толкованю своїх улогох чежкого и вимагаюцого тексту, окреме же представа пририхтана за кратки час.
Режисер Владимир Надь Ачим визначел же вше дзечнє вибера тексти Миру Ґаврана, та то треца представа хтору поставел по його текстох. Додал же на пририхтованю тей представи ґлумецка екипа добре сотрудзовала, було надосц пожертвовносци и одреканя, алє и вельо медзисобного порозуменя.
З тоту представу ше означує и два ювилеї Янка Лендєра – 60 роки живота и 40 роки його активносци у нашим културним и театралним живоце, та з тей нагоди директорка РНТ Ивана Дудаш после представи пречитала пригодни текст о Лендєровей роботи, а винчуюци на рочнїцох, у мено Театру му придала и пригодни дарунки.
Попри спомнутих, у витвореню новей представи РНТ участвую майстор шветла Желько Пашо, тон-майстор Владимир Бесерменї, костимоґраф Таня Орос, адаптация сценоґрафиї Александра Медєши, суфлер Танита Ходак, а бински роботнїк Дюра Хома.
Реприза представи будзе уж концом того тижня, на нєдзелю, 1. фебруара на матичней сцени Театру у Руским Керестуре.
