Пресадзованє паприґи у полним розмаху

автор сен
1.3k Опатрене

РУСКИ КЕРЕСТУР – После першомайских шветох, а ище интензивнєйше по Кирбаю,  у Руским Керестуре почало пресадзованє паприґи, а понеже роботу очежує и претаргує спреведаца ярня хвиля, пресадзованє вироятно будзе тирвац до конца мая.

Понеже того року звекшане число Керестурцох котри ше опредзелєли продуковац паприґу, будзе и вецей поверхносци под тоту желєняву, алє у Здруженю паприґарох „Capsicum anuum” обчекую же шицка паприґа найдзе свойого купца. Членїца Управного одбору Здруженя Душица Орос гвари же Здруженє достало и вецей понукнуца за осиґуранє, а обачиц и же вше векше число паприґарох осиґурює паприґу.

9-Papriga-02

Садзи ше и на стародавни способ – до фийовкох, алє найвецей на сучасни – на фолию, под систему залїваня капка по капку. Квалитет пресади рижни, алє як гваря паприґаре, пресада углавним добра. Тоти цо ше им, пре рижни причини, хованє пресади нє удало, можу ю купиц за 10 еври по квадратним метеру, гваря у Здруженю паприґарох.

Остатнї роки єден з векших проблемох у сезони пресадзованя то нєдостаток наднїчарох, та и того року паприґаре анґажую людзох и зоз сушедних местох,  углавним з Кули, Лалитю, Крущичу, Коцура, а наднїци коло 170 динари на годзину.

9-Papriga-03

ПОВЯЗАНИ ТЕКСТИ