КОЦУР – Всоботу, 30. мая, у єдней з учальньох Основней школи „Братство-єдинство” у Коцуре бувши школяре Школи означели пейдзешатрочнїцу малей матури. Орґанизаторе стретнуца були Силвестер Хромиш и Цецилия Чельовски, а на друженє пришли коло штерацец особи з вецей як осемдзешат, кельо их було у ґенерациї.
Бувши школяре народзени 1950. року, а основну школу закончели 1965. року. У тим чаше у коцурскей ОШ було два оддзелєня з наставу на руским язику и єдно на сербским. Зоз школярами ше всоботу стретли и їх дакедишнї учителє и наставнїки – Микола Кучмаш, Амалия Кучмаш, Десанка Миланович, Ґеорґиє Йоцев и Силвестер Д. Макаї.
И голу Школи опатрели виставу з часу їх школованя, а означованє 50-рочнїци малей матури предлужене на „Пелетовим салашу”.