БИКИЧ – Церква и вирни вчера на швето Успения Мацери Божей або Вельку Матку Божу преславели свойо храмове швето – Кирбай зоз шветочну Службу Божу хтору служел беркасовски парох о. Владимир Еделински Миколка, а сослужел о. Дарко Рац, парох з Бачинцох.
У казанї о. Еделински наглашел значносц Мацери Божей у християнским живоце и додал же успениє значи же Мария нє умарла, алє заспала. Наглашел и же би ше вирни требали спатриц на Марийов живот, бо Мария видзела кельо єй Господь Бог дал у живоце и вона му пре тото була подзековна.
На концу Служби Божей бул традицийни обход коло церкви з читаньом Євангелийох, а потим одшпиване „Многолїтствиє”.
Бикичанє мали госцох зоз рижних бокох, медзи хторима бул и Петро Сокол, предсидатель Старей Любовнї у Републики Словацкей.