БЕОҐРАД – Кед будзе прилапени нови Закон о моцних алкоголних напойох о хторим тих дньох розправяне у Скупштини Сербиї, физични особи свою палєнку годни предавац реґистрованим продуковательом. Як гварела министерка польопривреди Снежана Боґосавлєвич Бошкович, з новим Законом ше жада поєдноставиц правила за реґистрованє и продукцию, та на тот способ зменшац процент шивей економиї.
– Понеже зме знїжели трошки реґистрованя и зменшали нєобходни условия, велї продукователє швидко здобуду условия постац реґистровани продукователь палєнки и дугих моцних алкоголних напойох – гварела министерка и додала же трошки реґистрованя буду даскельо тисячи динари.
Закон уводзи и нови правила у защити ґеоґрафского походзеня, а будзе запровадзена и катеґоризация алкоголних напойох у складзе з директивами и стандардами Европскей униї, цо подрозумює 47 катеґориї алкоголних напойох и нови правила декларованя.
Нови стандарди оможлївя пласованє алкоголних напойох и на тарґовище ЕУ, гварела у толкованю нового закона министерка Снежана Боґосавлєвич Бошкович.