Прилапени вименки Закона о польопривредней жеми

автор танюґ/сен
825 Опатрене

БЕОҐРАД – Скупштина Сербиї вчера прилапела вименки Закона о польопривредней жеми, хтори медзи иншим предвидзую же вецей правни особи под аренду на 30 роки годни вжац до 30 одсто державней жеми у каждей општини.

Опозиция и нєзадовольни польопривреднїки вецей як мешац протестовали процив вименкох и твердзели же з їх прилапйованьом будзе оможлївене предаванє жеми странцом, цо министерка польопривреди Снежана Боґосавлєвич Бошкович демантовала и гварела же анї єден член Закона нє предвидзує предаванє жеми странцом.

Польопривреднїком котри маю до 30 гектари жеми оможлївене купиц до 20 гектари з одплацованьом на 10 роки.

Зоз Законом предвидзене и же правни и физични особи на безплатне хаснованє можу достац польопривредну жем хтора нє арендована и нє хаснована найменєй три аґроекономски роки, а хтора останє нєвилицитована у локалних самоуправох.

Период даваня под аренду ше предлужує з 20 на 30 роки, а предписане и першенство браня под аренду на основи инвестицийох, так же инвеститором першираз дата можлївосц брац державну жем под аренду, и то на 30 роки.

Вименки Закона о польопривредней жеми предвидзую и кари за безправне хаснованє державней жеми.

По урядових податкох, у Сербиї єст 830 000 гектари державней польопривредней жеми, а под аренду ше дава лєм 30 одсто. У прешлим аґроекономским року под аренду дати 260 000 гектари и приход бул 51 милион еври. Министерка Боґосавлєвич Бошкович наглашела же ше 570 000 гектари державней жеми очиглядно находза у шивей зони.

ПОВЯЗАНИ ТЕКСТИ