РУСКИ КЕРЕСТУР – На вчерайшей схадзки Управни одбор (УО) Дому култури Руски Керестур, у новим составе, под предшедованьом Биляни Ковачевич, прилапел Звит о роботи тей установи за 2015. рок, а принєшени и Правилнїк о Фестивалє рускей култури „Червена ружа”.
У Звиту о витвореню програми начишлєни аж 45 рижни програмни активносци секцийох (и други) хтори Дом култури бул обовязни витвориц у прешлим року, дзе 14 реализовани и понад планованого. Як наявене, УО пошвидко будзе розпатрац и Финансийни звит за прешли рок.
З векшину гласох члени УО вчера прилапели Правилнїк о Фестивалє рускей култури „Червена ружа”, з хторим одредзени состав, компетенциї, цилї, способ роботи, пропозициї и други питаня вязани за орґанизованє и отримованє Фестивалу.
УО Дому култури, як помоцне цело, снує Орґанизацийни одбор Фестивалу, хтори, як то по Правилнїку, будзе меновани по представительним принципе, а з окремну одлуку УО. Орґанизацийни одбор Фестивалу менує предсидателя, подпредсидателя и секретара, а мандат Одбору штири роки.
На схадзки УО заключене же подобни правилнїки пошвидко треба виробиц и за други два фестивали хтори орґанизує Дом култури – за Драмски мемориял Петра Ризнича Дядї и Културну манифестацию „Костельникова єшень”, а за шицки и їх представительну основу.
Окончователь длужносци директора Дому култури Яким Рац на вчерайшей схадзки членох УО упознал з нагаднуту барз нєвигодну ситуацию коло финансованя фестивалох з покраїнских жридлох, пре наявене вельке зменшанє буджетних средствох за конкурси у обласци култури.