РУСКИ КЕРЕСТУР – Совит Месней заєднїци (МЗ) Руски Керестур на вчерайшей схадзки прилапел План явних набавкох за 2015. рок, хтори плановани на 3 милиони 545 000 и постанє состойна часц ребалансу буджету Општини Кула, як наявене, у марцу. План будзе обовязуюци и годно го меняц лєм з ребалансами финансийних планох МЗ, односно буджету општини.
Бешедуюци о финансийох у тим року, предсидатель Совиту МЗ Владимир Олеяр окреме наглашел же Општина Кула за роботу МЗ и инвестицийни роботи у валалє того року планує опредзелїц прейґ 3 милиони 700 000 динари, а прешлого року то було милион 800 000.
Пре ускладзованє шицких актох з нову Одлуку о Месних заєднїцох на териториї Општини Кула принєшеней концом прешлого рока, Совит вчера прилапел и нови Правилнїк о роботних местох з описом роботох Служби МЗ, на хтори согласносц перше ма дац Општинска рада Општини Кула. У складзе з тим, окремна Комисия Совиту зоз спомнуту Одлуку ускладзи и Статут МЗ, цо длужни шицки МЗ у општини.
На вимогу „Заводу за вибудов” Кула, Совит вчера дал согласносц же би тото явне подприємство керестурскому Конїцкому клубу (КК) „Русин” и далєй на хаснованє дало 2 парцели на Лейох, за гиподром. Власнїк тих дєпох Општина, розполага з нїма спомнути Завод, а понеже КК вишол контракт о пейцрочним хаснованю, ознова од Заводу вимага же би им одобрел хаснованє прейґ 9 гектарох на Лейох.
Вязано за тото, Совит препоручел КК и Керестурцови Славкови Надьови, котри до половки юлия того року зоз Заводом ма контракт о хаснованю коло гольт и пол дєпох на Лейох, же би ше медзисобно порадзели о їх хаснованю.
На вчерайшей схадзки Совиту присуствовали и одборнїки у Скупштини општини Кула – спомнути Славко Надь и Мария Шепински, як и предсидатель КК „Русин” Иван Медєши и член Клубу Янко Планчак.
