КОЦУР – З нагоди 70 рокох народзеня нашей поетеси и писательки Серафини Макаї, у Основней школи „Братство єдинство” у Коцуре вчера отримана пригодна програма хтору орґанизовали учительки зоз спомнутей школи, у хторей Серафина длуго робела як наставнїца руского язика, и Дружтво за руски язик, литературу и културу (Дружтво), чий є вельорочни член.
Присутних школярох и колеґох привитала наставнїца руского язика Снежана Шанта, а потим заступнїца Дружтва Ирина Папуґа пречитала поетесову биоґрафию. На тей пригодней шветочносци присуствовал и предсидатель Скупштини Дружтва др Юлиян Рамач
У програми участвовали школяре од першей по штварту класу з порядней настави по руски, та школяре котри руски язик виучую як виборни предмет. Дзеци рецитовали и шпивали писнї Серафина Макайовей, а пририхтали их їх учительки.
Ювилантка и сама пречитала даскельо свойо писнї и виривки з приповедкох, а од орґанизаторох достала и дарунки за родзени дзень. На окремним паноу були виложени и малюнки Макайовей, понеже и мальованє єдна з єй замерйкованих активносцох.
