НОВИ САД – Стреду, 11. марца отримана схадзка Покраїнскей влади и роботней ґрупи хтора основана же би ше нашло одвитуюце ришенє за предлуженє роботох на вибудови Жежельового мосту у Новим Садзе. Пре нєпорозуменє медзи инвеститорами и виводзачом роботи мост, хтори по першим контракту мал буц закончени 2013. року, ище вше нє у функциї.
Инвеститор проєкту Влада Сербиї, а прейґ Желєзнїцох Сербиї. Проблем настал кед виводзач роботи – шпанско-италиянски конзорциюм „Азви“, поглєдовал средства за дополнююци роботи хтори нє були предвидзени кед придавали понукнуце на тендер. Понеже на основи законскей документациї нє було можлївосци же би финансиєре -Автономна покраїна Войводина и Город Нови Сад виплацели дополнююци средства виводзачови, роботи на вибудови мосту станули.
Прешлого тижня достата потребна документация за можлївосц финансованя дополнюнюцих роботох, та роботна ґрупа Покраїнскей влади предложела даскельо модели як уплациц нєобходни средства за предлуженє вибудови Жежельового мосту. Предлог прешлїдзени членом роботней ґрупи Влади Сербиї и до Министерства будовательства же би дали свойо думанє.