НОВИ САД – Руски културни центер (РКЦ) з Нового Саду вчера, 13. децембра, отримал Рочни концерт з назву „РКЦ свойому городу”. Концерт отримани у Новосадским театре, чия сала з тей нагоди була полна з публику, а на Рочним концерту участвовали коло 100 аматере – дзеци и старши.
Дзецински секциї представяли Дзецински хор, соло шпивачка Сара Надрлянски и шпивацки дует Саша Загорянски и Мижо Ковач, як и Дзецинска фолклорна ґрупа, хтора одтанцовала „Коломийку”.
Хор „Гармония”, под дириґентствпом Весни Кесич Крсманович, на Рочним концерту виведол три руски шпиванки, Женска шпивацка ґрупа и Хлопска шпивацка ґрупа по вецей руски, як и шпиванки других народох, Фолклорна ґрупа ветеранох ше представела з двома хореоґрафиями – Руски танци и „Войводина”, а Виводзацка фолклорна ґрупа з „Варешковим танцом”. Шицких провадзел Народни оркестер РКЦ.
Дзеци-виводзачох за Рочни концерт пририхтали Ана-Мария Рац и Михаил Римар, фолклорни секциї старших Владимир Иван и Миломир Шайтош, а шпивацки ґрупи уметнїцки руководитель Женскей шпивацкей ґрупи и оркестру Мирослав Пап, та Хлопскей Борут Павлич и Михайло Колєсар.
Публику, та госцох – присутних членох НС и представительох установох и здруженьох на початку концерту привитала радио-водителька Саня Маркович, котра на концу и подзековала виводзачом и публики, як и главному спонзорови – Управи за културу Городу Нови Сад.
