Робни резерви одкупюю 25 000 тони кукурици

автор ртв/зам
843 Опатрене

НОВИ САД – Републична дирекция за робни резерви одкупи 25 020 тони тогорочного урожаю кукурици, а на основи Заключеньох Влади Сербиї з початку того мешаца,  сообщела новосадска Продуктна берза.

Будзе одкупйована меркантилна кукурица тогорочного урожаю домашнього походзеня по 19 динари за кґ, з ПДВ, а одкупйовац буду силоси овласценого маґазионеру Дирекциї. Кукурицу годни предац реґистровани польопривредни ґаздовства з индивидуалного сектору (физични особи), як и землєдїлски задруґи (правни особи).

Одкуп почина на вовторок 17. новембра и будзе кажди роботни дзень од 8,30 до 14,30 г., покля ше нє одкупи предвидзене количество. Конєчни термин за одкуп кукурици за Робни резерви 30. новембер.

Ношитель ґаздовства годзен предац найменєй 10 тони, а максимално 100 тони. Задруґи годни предац найменєй 20, а найвецей 150 тони.

Одкуп будзе прейґ Продуктней берзи у Новим Садзе, а Дирекция одкупену кукурицу виплаци о 15 днї од дня доручованя комплетней документациї, односно подписованя контракту.

Потенциялни предаваче ошлєбодзени од плаценя берзанскей провизиї, а зноша лєм трошки транспорту по овласцени маґазин и трошки анализи квалитету кукурици  хтору предаваю.

 

 

ПОВЯЗАНИ ТЕКСТИ