Леґенда:
НСР: Национални совит Руснацох
РЦМ: Роботне цело за младих
Роботне цело за младих Националного совиту Руснацох (НСР) ма важну улогу у уключованю младих до явного и културного живота заєднїци. През конкурси, проєкти и промоцийни активносци тото цело сце приблїжиц роботу Националного совиту младим Руснацом. Роботне цело за младих основане на початку 2023. року, кед формовани и шицки одбори и роботни цела. У нїм були дзевец члени, тройо зоз Керестура, двойо зоз Коцура, двойо зоз Дюрдьова и по єден з Нового Саду и зоз Шиду.
У нїм тераз єст 5 члени, од 9, а тельо их було кед тото цело конститутоване. Прецо то так, дознаце у шлїдуюцих шорикох.
Нач нам тото Цело?
– Функция РЦМ то зобудзиц, порушац, отримац, зачувац националну свидомосц при младих, уключовац младих до явного живота у заєднїци, прицагнуц их до роботи здруженьох, установох, орґанизацийох, медийох и Националного совиту, на таки способ яки младим блїзки, през активносци хтори им интересантни. Тото можу поробиц лєм млади медзи собу, бо старши нє маю достаточно знаня о тим цо младих наисце интересує и, зоз найлєпшей намири, (чесц винїмком) у векшини случайох зоз нєадекватним приступом одбиваю младих од векшого анґажованя у гоч чим у заєднїци – визначую нам зоз Националного совиту.
А цо тото Цело роби?
Роботне цело за младих функционує на схадзкох, на хторих приноши одлуки о своїх активносцох.
- Окончує шицку процедуру вязану за Конкурс за проєкти младих (розписує, одредзує часц буджету хтори будзе подзелєни, одлучує о проєктох и розподзелює средства).
- Друга часц функционованя то провадзиц и промововац проєкти, хтори финансовани прейґ того конкурсу.
- Треци сеґмент ше одноши на промоцию самого Роботного цела, односно приблїжиц його улогу младим у нашей заєднїци.
Буджет
Буджет, по податкох хтори зме добили зоз НСР:
Вкупни буджет:
- 2023. рок: 400.000 динари;
- 2024. и 2025. рок: по 450.000 динари.
През конкурси за младих розподзелєне:
- 2023. рок: 370.000 динари;
- 2024. рок: 380.000 динари;
- 2025. рок: 400.000 динари.
Средства котри остали потрошени за отримованє дружтвених мрежох, дизайн визуалного идентитету и за промоцийни активносци, медзи хторима и промоция уписованя до окремного виберацкого списку.
Потримани проєкти у 2025. року:
- РКЦ – Нови Сад – Прадки у Матки – 70.000 динари;
- РКЦ – Нови Сад – Титлованє филмох – 50.000 динари;
- Pact Ruthenorum – Руски Керестур – Медзинародни волонтерски камп 2025 – 125.000 динари;
- Pact Ruthenorum – Руски Керестур – Мултимедиялна манифестация за младих Дньовка 2025 – 45.000 динари;
- СОФИА – Нови Сад – Проєктне финансованє – умрежованє – 35.000 динари;
- КУД „Тарас Шевченко” – Дюрдьов – Алога Дюрдьов (Стретнуце у Дюрдьове) – 75.000 динари.
Сотрудїцтво зоз членами
Зоз НСР толкую же сотруднїцтво зоз членами того, алє и прешлих зволаньох, було наисце одличне.
– Члени РЦМ то млади особи котри, углавним, нє маю вельо искуства у административних, финансийних и подобних роботох, алє маю дзеку учиц, прилапйовац одвичательносц и обовязки. Свидоми су своєй националней припадносци, цеша ше у нєй, полни су зоз идеями и енерґию и сцу и у других особох порушац тоту свидомосц, а шицко на таки способи яки нєшкайшим младим блїзки – гваря зоз Националного совиту.
Яки упечатки членох?
Задзекованя у 2025. року:
21. юлия 2025. року на предклад членох НСР отримана позарядова схадзка, на хторей НСР дал предкладанє же би зоз места предсидательки и членїци Одбору за образованє була розришена Олена Папуґа. Як одвит на тоту одлуку, ушлїдзели задзекованя по Одборох, медзи хторима були и тоти зоз РЦМ.
У юлию и авґусту 2025. року пейц члени Роботного цела за младих дали задзекованя, тройо зоз Керестура и двойо зоз Коцура, а медзи нїма и предсидатель Роботного цела.
Контактовали зме зоз троїма членами хтори дали задзекованя, и достали зме одвит же бувши члени хтори задзековали у РЦМ нє даваю вияви до медийох, и же шицких котри од нїх потераз питали вияву, одбили.
– РЦМ тераз творя млади зоз местох дзе жию Руснаци. РЦМ ше намага злєпшац положенє младих у рускей заєднїци и подзвигнуц им свидомосц о своєй култури. О ситуациї, кед даєдни члени вишли зоз РЦМ, нє будзем коментаровац прето же то особна воля каждого. Одкеди я у РЦМ, зоз Националним совитом маме досц добре сотруднїцтво. Кед нам помоц була потребна, вше нам помогли и нїґда ше нє мишали до нашей роботи – гварел нам Петро Хромиш зоз Дюрдьова, член РЦМ.
Анкета:
Концом 2025. року зме поробели онлайн анкету о упечаткох младих о роботи НСР, та зме достали рижни одвити. Углавним ше одволали млади од 20 по по 40 роки, хтори були упознати зоз роботу РЦМ.
Други нам предложели най поробиме дацо вецей, окрем того же розписуєме Конкурс раз рочнє, и гварели нам же проєкти добри, алє же саме Цело нє досц активне. Людзом ше пачи же РЦМ потримує Руснацох зоз цалей Войводини, же ше добре розподзелює средства зоз хторима розполага и окреме ми мило же члени РЦМ нє були под политичним уплївом и же дали задзекованя.
Опитали зме ше младим цо би сцели же би у наиходзацим року Роботне цело за младих НСР робело вецей, та зме достали одвити:
– Можебуц би требало на даяки способ порушац младих. На Централней преслави Дня Руснацох у Митровици було менєй як 10 младих. Мало людзе приходза на Алога Дюрдьов, а на руских балох єст вше вецей сербскей музики. З Цела треба най виберу на яке подруче ше буду фокусовац, а потим най обдумаю стратеґию його злєпшованя.
– Думам же би ше Цело требало озбильнєйше занїмац з роботу младих у каждим валалє и (окрем проєктох) пробовац повязац младих зоз розличних местох. Можебуц би було добре упознац младих (поготов од 15 до 20 рокох) з роботу Роботного цела и потолковац им за цо воно служи. Цело би могло и на дружтвених мрежох буц активнєйше и ажурнєйше, бо то место дзе млади нєшка шицко провадза.
– Думам же треба вецей койчого класц до медийох и на дружтвени мрежи, нє лєм як вистку и наяву, алє и най ше пласує змист на интернет. Хиби гумор и треба ещи нови медиї, як цо мода и даяки цикави мерч, итд.