РУСКИ КЕРЕСТУР – На своєй вчерайшей схадзки Совит Месней заєднїци (МЗ) Руски Керестур прилапел звит, односно предкладаня и зауваги Керестурцох зоз Збору гражданох, хтори отримани 28. новембра, так же у наступним чаше винєшени, векшином комунални проблеми, буду ришовани.
Понеже на основи Закона о явней власносци месни заєднїци вецей нє власнїки нєрухомосцох, алє су у явней власносци општинох, у складзе з дописом з Општини Кула Совит МЗ вчера принєсол одлуку о розтаргованю контрактох о закупу трох обєктох з їх закупцами, а вони закуп годни предлужиц з компетнентима у Општини Кула. Слово о Младежским доме, чекальнї на автобускей станїци (погосцительни обєкт „Бомбай”) и єдней предавальнї на Вельким шоре.
На схадзки Совиту одлучене же рочна преширена схадзка Совиту МЗ, хтору ше традицийно орґанизує на концу єдного рока, будзе 30. децембра (стреда) на 17 годзин у конференцийней сали у спортскей гали. На схадзку буду поволани представителє привредних орґанизацийох, установох, институцийох и здруженьох Керестура, а исти дзень на 14 г. у Велькей сали Дому култури будзе дочек Дїда Мраза. МЗ орґанизує и заєднїцки дочек Нового року, 31. децембра на пол ноци у центре валалу, як и дотераз – з огньометом.
Позитивно ришени и дзепоєдни вимоги за помоц, так же Совит з дотацийох за дружтвени орґанизациї 20 000 динари опредзелєл Месней орґанизациї Здруженя инвалидох роботи, а винайдзе ше и потребни средства за кладзенє одвитуюцих цегелкох до апатики у валалскей Здравственей амбуланти.
Понеже у Здравственей амбуланти у Керестуре уж длугши час нє роби дзецински лїкар, алє ше муши одходзиц до Кули, Совит до Дому здравя Кула пошлє вимогу же би ше тот проблем ришело.
Одлучене же МЗ на одредзени способ поможе и у одходох, односно превозу младого шпивача Себастияна Надя до Беоґраду, школяра осмей класи керестурскей Школи, котри участвую у змаганю у шпиваню у емисиї „Пинково гвиздочки” на ТВ „Пинк”. Предложене же би МЗ єдно циркуларне писмо о помоци у превозу, як и одходу патрачох до студия, послала и керестурским привреднїком, а бешедоване и о других можлївосцох одходу пре потримовку младому Себастиянови.