РУСКИ КЕРЕСТУР – На вчерайшей схадзки Орґанизацийного одбору Фестивалу рускей култури „Червена ружа“ одлучене же 54. Фестивал будзе од 26. по 28. юний, як и дотераз, у Школи „Петро Кузмяк“ у Руским Керестуре. На схадзки бешедоване и о змистох, та других активносцох за пририхтованє „Червеней ружи“.
Дотерашнї предсидатель Орґанизацийного одбору Сашо Палєнкаш на схадзки дал задзекованє на тоту длужносц, а за нового предсидателя вибрани Желько Ковач, предсидатель Вивершного одбору Националного совиту Руснацох.
Утвердзене же перши дзень тогорочней „Ружи”, на пияток, 26. юния, будзе вистава подобових роботох, а потим манифестация дзецох „Червене пупче“, на хторей буду виведзени од 16 до 18 нови композициї. Як и скорейши роки, на „Пупчу” наступя и дзецински музично-танєчни ансамбли з наших местох.
Други дзень, на соботу, 27. юния, дополадня будзе отворени уж традицийни „Керестурски саям”, того року на отвореним – на спортских теренох у Школи, з акцентом на стари ремесла. На вечар будзе Шветочни концерт „На штред широкей ровнїни“, на хторим наступя побиднїцки точки з наших фестивалох, як и госцуюци ансамбл з иножемства – ПУЛС (Поддуклянски уметнїцки народни ансамбл, дакедишня ПУНА) з Пряшова, зоз Словацкей.
Треци дзень Фестивалу, на нєдзелю, 28. юния будзе традицийне змаганє за найкрасши дзивоцки и леґиньски глас, як и змаганє нових композицийох у забавним духу, вибраних з прешлорочного конкурсу „Ружи”.
Як поведзене на вчерайшей схадзки, под час Фестивалу и керестурска младеж орґанизує концерт даєдней ґрупи, о чим будзе порадзене познєйше.
Рамикови финансийни план тогорочней „Червеней Ружи“ виноши милион и 550 000 динари, а пре утвердзованє конкретних змистох манифестацийох, уж о тидзень будзе отримана схадзка Програмного одбору Фестивалу.
