„Русин купˮ освоєли Коцурци

автор а. медєши, фото лю. дудаш
819 Опатрене

РУСКИ КЕРЕСТУР – Медзинародни квалификацийни турнир у фодбалу „Русин купˮ одбавени всоботу у Спортскей гали у Руским Керестуре, а „Русински погарˮ того року освоєла екипа „Коцурциˮ.

Екипа „Коцурци” у финалним змаганю победзела екипу НК „Русинˮ зоз Миклошевцох зоз резултатом 3:2. За треце место борели ше екипи зоз Руского Керестура, та „Керестурски мотилїˮ победзели екипу „Браца Русиниˮ, з резултатом 1:0. 

За найлєпшого ґолґетера на турниру преглашени Борис Бодонї и Драґан Комазец зоз екипи „Коцурциˮ.

На турниру бавели вкупно 8 екипи – екипа НК „Русинˮ зоз Миклошевцох, „РТВ” зоз Нового Саду, „Коцурциˮ и „Оаза” зоз Коцура, „Спортски бависка Яша Баков” хтору творели фодбалере зоз вецей наших местох, як и „Керестурски гунцути”, „Керестурски мотилїˮ и „Браца Русини” шицки три екипи з Руского Керестура.

Перши три екипи ше пласовали на финалне змаганє котре будзе отримане 29. фебруара у Бардейове у Републики Словацкей, медзитим, понеже себе Миклошевчанє обезпечели пласман на финале так же прешлого року однєсли побиду на „Русин купˮ турниру у Руским Керестуре, а тиж и на тогорочним турниру ше нашли медзи трома найлєпшима екипами, на финалним змаганю у Бардейове будзе участвовац и штвартопласована екипа „Браца Русиниˮ зоз Керестура.

Окрем у Руским Керестуре, квалификацийни турнири одбавени и у Братислави, Старей Любовнї, Свиднїку и Михайловцох.

ПОВЯЗАНИ ТЕКСТИ