РУСКИ КЕРЕСТУР – У Велькей сали Дому култури Руски Керестур, 47. Драмски мемориял Петра Ризнича Дядї вчара вечар шветочно отворел подпредсидатель Покраїнскей влади и покраїнски секретар за привреду, обезпечованє роботи и ровноправносц полох Мирослав Васин.
Васина и публику перше привитал директор Дому култури Йоаким Рац, наглашуюци же през 47 роки на Мемориялє виведзени прейґ 400 театрални представи по руски, а прейґ 100 на язикох других националних заєднїцох.
Подредсидатель Васин присутних привитал у мено Покраїнскей влади и пренєсол почитованє и потримовку отримованю фестивалу и од єй предсидателя, др Бояна Пайтича.
Мирослав Васин поетски визначел же смисел постояня Покраїнскей влади войводянска мултикултуралносц и мултиетнїчносц, чий важни сеґмент и руска национална заєднїца. Влада прето потримує и театри на язикох националних заєднїцох, як снователь и Руского народного театру „Петро Ризнич Дядя” и финансийно го помага у своїх можлївосцох, тераз то рочнє за єдну представу.
– Було би то, вшелїяк, ище богатше кед би, як и други локални самоуправи, и тутейша локална самоуправа превжала свою улогу у финансованю материяних трошкох того театру. Прето же лєм зоз заєднїцким стараньом и локалних и покраїнских и републичних орґанох посцигнєме пестованє богатства розличносцох националних заєднїцох хтори творя Войводину и Сербию – заключел подпредсидатель Покраїнскей влади Мирослав Васин отвераюци Мемориял.
Вецей фотоґрафиї на початним боку сайту у фото-ґалериї.