ШИД – Семинар фолклору у орґанизациї Заводу за културу войводянских Руснацох закончени вчера, 12. авґуста, у Шидзе.
Викладаче на семинару, хореоґраф Вилиям Микула и його асистентка Мирям Манїкова зоз Прешова зоз Словацкей Републики, учашнїком представели основни елементи за дзевец хореоґрафиї зоз реґиону Шариша, Земплину и Спишу.
Хореоґрафски елементи котри научели на семинаре применя у обдумованю нових хореоґрафийох у своїх дружтвох хореоґрафи зоз Руского Керестура, Дюрдьова, Петроварадину, Нового Саду, Бикичу и Шиду. Корепетитор на гармоники бул Мирон Сивч.
Шицки учашнїки ше складаю з оцену же и семинар и змесценє у будинку Лєтнєй владическей резиденциї було добре орґанизоване, а у шлєбодним чаше мали нагоду упознац Шид.
