Сербия медзи остатнїма по висини плацох у просвити

автор дневник/сен
719 Опатрене

БЕОҐРАД – Пре дефицит у буджету и нови мири фискалного шпорованя, Сербия єдина держава у Европи у хторей 2014. и 2015. року зазначене зменшованє плацох просвитним роботнїком за вецей од єден одсто – указую податки зоз студиї „Плаци и приходи учительох и директорох школох у Европи”.

Студия хтору окончела Европска комисия ше одноши лєм на учительох, наставнїкох и директорох основних и штреднїх школох и представя найвисшу и найнїзшу плацу директорох у одношеню на бруто домашнї продукт (БДП). По висини плацох директорох, Сербия при концу лїстини, а на подобним уровню як Румуния, Болгарска, Македония и Турска.

Стратеґия розвою образованя у Сербиї по 2020. рок, медзи иншим, предвидзує звекшоваланє суми хтору держава дава за образованє и ма досцигнуц шейсц одсто БДП. Заплановане же 2016. року за образованє з буджету будзе видвоєне 5,2 одсто БДП, 2018. року 5,6 одсто, а 2020. року до образованя будзе уложене шейсц одсто БДП.

Звекшованє даваньох за образованє будзе ускладзене з реалним буджетом и можлївосцами, а пре злєпшанє ситуациї, держава може поглєдац и други жридла финансованя, як цо то од Европскей униї, Шветовей банки, Европскей комисиї, Европскей инвестицийней банки, наводзи ше у Стратеґиї розвою образованя Министерство просвити, науки и технолоґийного розвою.

ПОВЯЗАНИ ТЕКСТИ