НОВИ САД – З нагоди Националного швета Руснацох, НВУ „Руске слово” видала специялне число новинох на аж 44 бокох, та на початних тексти предсидателя Националного совиту Руснацох Славка Раца и предсидателя КПД „Карпати” др Деяна Загорянския. Представени и Руснацох у Вербаше, як домашнї тогорочней Централней преслави швета, на тих бокох розгварка з предсидательом Општини Вербас др Братиславом Кажичом, а спред єдного з орґанизаторох преслави – Заводу за културу войводянских Руснацох, пише його директор мр Серґей Тамаш. На тих бокох и теми о руским школстве и сотруднїцтве Словацкей и Сербиї, та о одгукох после виберанкох за национални совити.
Специялне число новинох ма и свойо стаємни рубрики, та тема „Тижньовнїку” Школско-спортска гала у Руским Керестуре, а „Култура и просвита” представя Ану Римар, єдну з найлєпших студентох на Филозофским факултету. „Руске” приноши и кратшу наяву о тим цо читаче можу пречитац у новим „Руским християнским календаре 2015”.
„Нашо места” пишу о актуалней теми – анґажованю хасновательох социялней помоци у Шидзе и о планованих роботох зоз средствох самодоприносу у Руским Керестуре. Попри других, ту и тексти о приватизациї Явного подприємства Радио Шид, док „Економия” пише о продукциї риби у керестурским рибалове.
Рубрика „Духовни живот” свойо боки пошвецела Каритасовому дзецинскому куцику Керестуре, стретнуцу Фоколарох у Коцуре, нащиви дзецох Старей Бинґули, док на бокох рубрики „Людзе, роки, живот” представена Хромишова фамелия з Нового Саду, надалєко позната по квалитету роботох з водоводнима инсталациями.
За розвагу нове „Руске” понука „Медзипростор за кафу и виключеня”, а „Мозаїк” представя Аниту Абодї зоз Сримскей Митровици и Марину Томаш з Коцура.
На „Спорту” пише о Сари Планчак, найлєпшей каратистки керестурского „Русину”, о успихох змагательох у боди-билдинґу Любомирови Шарикови и Алексейови Будинскийови з Коцура, Михаилови Дудашови, котри преглашени за найлєпшого промотера атлетики АК „Войводина”, як и о преглашеню найлєпших спортистох у Вербаше.
Средства за специялне число новинох достати на Явним конкурсу Городу Нового Саду, як проєкт з назву „Модуси обстояня Руснацох – язик, култура, традиция и економия у функциї очуваня националного идентитету”.