НОВИ САД – Того року ше Дзень безпечного интернету означує з паролу „Хтора твоя улога?”, хтора поручує же кажди поєдинєц од малючка може допринєсц безпечному и одвичательному хаснованю сучасних информацийно-комуникацийних технолоґийох.
З нагоди нєшкайшого Дня безпечного интернету Покраїнски омбудсман спозорел же Сербия ище вше нє ма документ на державним уровню хтори препознава експлоатацию дзецох прейґ интернету и мобилних телефонох, гоч то вше заступенша форма злохаснованя и насилства над дзецми.
Прешлого року пре хаснованє малолїтних особох за порноґрафию загарештовани 35 особи, цо вецей у одношеню на прешли роки.
– Ситуация зложенша прето же провайдере услугох интернету нє препознаваю дзеци як ґрупу хасновательох, та и їх свидомосц о потреби охраньованя дзецох на нїзким уровню – сообщел Омбудсман и спозорел же родичи муша научиц препознац и зочиц ше з фактом же їх дзецко жертва злохаснованя, лєбо то може постац.