Город Нови Сад од 1. новембра превжал на себе старац ше о „Притульним доме” („Свратиште”), месту дзе ше збераю дзеци котри блукали по новосадских улїцох. Там ше можу ограц, дацо заєсц, бавиц ше на компютеру и медзи собу, алє и научиц буц чисти, културни, толерантни, и почитовац своїх товаришох. Дзецом з улїци то нє нови дом, бо ту можу буц од осем рано до дзевец вечар, алє голєм на хвильку можу забуц на свой, та и наш заєднїцки и вельки дружтвени проблем.
Пред пейц и пол роками ЕГО – Екуменска гуманитарна орґанизация, як нєвладова волонтерска орґанизация, обачела як вельки проблем дзецох и младежи котри блукаю по новосадских улїцох и орґанизовала за нїх простор дзе би могли ограц и препровадзиц даскельо годзини. З часом ше звекшовало число дзецох, простор на Булевару ошлєбодзеня 28 бул за нїх мали, ширели ше потреби за костираньом, шматами, гиґиєну… алє и за надпатраньом и воспитаньом.
ЗБЕРАНЄ СРЕДСТВОХ
Волонтере зоз ЕГО нє мали вельо средства и ровно ше трапели даяк дойсц до нїх. Було хвильки кед ше думало же ше „Притульни дом” и загаши, алє вше ше якош виплївало зоз кризи.
– До средствох зме чежко доходзели, бо вше зме вецей мали дзеци котри питали од нас помоц, а спонзоре помагали кельо могли, и после одредзеного часу одуставали. Припознавали нам же и вони вецей нє маю средства. Вец зме ше здогадли средства глєдац од городу, поволали зме городоначальнїка Нового Саду Милоша Вучевича же би ше прешвечел до того цо робиме и од теди ше ствари злєпшали – приповеда руководитель „Притульного дому” Далиборка Батрнек Антонич.
Прейґ Городскей управи за социялну и дзецинску защиту ознова реновирани просториї на Булевару ошлєбодзеня, число 39, просто драги старого обєкта, тераз на вельо векшей поверхносци, зоз потребнима гиґиєнскима условиями, видео надпатрунком…
– Локация барз добра, блїзко Автобусна и Гайзибанска станїца, тадзи преходза велї городски и пригородски автобуси, дзеци нас швидко пренаходза, блїзко Социялне, та и Полицийна станїца, гоч и потераз нїґда нє було нїяки проблеми. Медзитим, и то треба мац на розуме – гвари Далиборка Батрнек Антонич.
УКЛЮЧОВАНЄ ДЗЕЦОХ ДО ДРУЖТВА
– Основни циль „Притульного дома” же би дзецом з улїци, котри виключени зоз дружтвеного живота и котри нє ходза до школи, обезпечел основни потреби за живот, за поживу, шмати, особну гиґиєну, ученє животних схопносцох, доставанє розличних информацийох, психосоциялну потримовку. На щесце Нови Сад ма добрих людзох и институциї котри сцу помогнуц, окреме младим согражданом котри ше на улїци сами знаходзи, церпя, и часто приходзи до нємилих ситуацийох – гутори Ненад Драшкович, директор Центра за социялну роботу городу Нови Сад.
Гоч город у цалосци финансує „Притульни дом”, дзепоєдни активносци нє предвидзени. До збераня средствох уключени сами заняти и волонтере.
Поведзме, порихтана новорочна програма и назберани дарунки за дзеци, а тераз ше помали рихта програма и дарунки за дзень женох.
ВЕЛЬКА ПОМОЦ ВОЛОНТЕРОХ
Попри пецерих занятих, барз помагаю волонтере, штредньошколци и студенти, углавним зоз Педаґоґийней академиї и Медицинского факултету, котри у „Притульниим доме” здобуваю окремне искуство котре им будзе на хасен док почню робиц у професийних установох.
Понеже у „Притульним доме” препровадзую, так повесц, цали дзень, през роботнї, алє тиж так и през комуникацию, уча ше буц толерантни, меняц звикнуца, свойо одношенє ґу людзом и вредносцом дружтва.
„Притульни дом” ше влапел до наисце нє лєгкей алє гуманитарней роботи – же би дзеци з улїци, чийо родичи звичайно нєзаняти, без приманьох, котри лєбо ходзели до школи лєбо нє, нєсиґурних до себе, без психосоциялней потримовки, врацел до дружтва.
ПРИЛАПЮЮЦИ ДОМ НА КЛИСИ
Тих дньох на новосадским населєню Клиса, односно Месней заєднїци Слана бара, почала вибудов прилапююцого дома за дзеци з поремеценями у справованю. Капацитет би бул за 500 дзеци котри мали проблеми зоз законом, старосци до 18 рокох, и ту би требали найсц защиту и учиц ше, прилагодзиц ше ґу новому способу живота. Дом би требал буц отвореного типу.
Сам початок будованя виволал вельке нєзадовольство гражданох котри жию у тим краю, за котри гваря же є мирне сушедство. Коло 2 000 гражданох подписали петицию процив вибудови того обєкту,
На трибини, котра орґанизована прешлого тижня, компетентни пробовали прешвечиц гражданох же тот прилапююци дом будзе добре функциновац и же нє будзе нїяки проблеми.
ДАКЕДИ ПОЛ ТАНЄРА, ДАКЕДИ РЕПЕТЕ
„Радосне дзецинство” випоручує 25 опорциї, алє ше их нє вше розподзелює и на тельо танєри. Понеже дзеци нє приходза кажди дзень, цо тиж так вельки проблем, дакеди достаню менєй у танєру, а дакеди и репете.
Пред тим як шедню за стол обовязне умиц руки. Дзепоєдни ше аж и тушираю.
Евидентує ше кажди приход и одход, и пробує ше дознац и прецо дахто нє пришол. Вжиме дзеци приходза вецей, а влєце менєй, бо ше нє муша нїґдзе ограц.
