РУСКИ КЕРЕСТУР – У рамикох манифестациї „Днї керестурскей паприґи” Руски Керестур бул домашнї госцом зоз Земплинскей Теплици, населєня у восточней Словацкей хторе ше дараз тиж волало Керестур.
Попри того же Тепличанє наступали у културно-уметнїцкй програми на манифестациї, їх урядова делеґация и представителє керестурских и руских институцийох бешедовали и о можлївосцох за дальше конкретне сотрудзованє, насампредз у обласци култури, спорту и туризму, як и черанки школярских екскурзийох.
На схадзки отриманей всоботу дополадня у просторийох Месней заєднїци Руски Керестур спред домашнїх участвовали предсидатель Совиту МЗ Владимир Олеяр, предсидатель Вивершного одбору Националного совиту Руснацох Желько Ковач, секретар керестурскей Основней и штреднєй школи з домом школярох Петро Кузмяк Михайло Надь, як и окончовательки длужносци директора РНТ „Петро Ризнич Дядя” и Заводу за културу войводянских Руснацох Таня Арва Планчак и Ивана Дудаш. Вони привитали старостку Земплинскей Теплици Йозефину Угальову, заменїцу директора Основней школи Марцелу Станчикову и предсидателя Фолклорного дружтва „Тепличан” Терзию Кубанїйову.
