БЕОҐРАД – У одношеню на прешли, польопривреднїки того року буду доставац за 8 000 динари менши субвенциї за польодїлску продукцию. За гектар субвенция будзе 4 000 динари, дзе 2 000 по гектаре основни стимул за рошлїнску продукцию, а 2 000 динари по гектаре реґрес за штучни гної, стої у Уредби Влади прилапеней всоботу, 30. януара, а Министерство польопривреди ю обявело вчера.
По новей Уредби премиї за млєко нє пременєни, та и того року буду седем динари за литру.
Стимулациї у статкарстве ше рушаю од 60 динари за кури, та по 25 000 динари по гарлу за приплодни крави и крави за карменє. Предвидзени и пориви за квалитетни приплодни матки риби потьки и пеструшки 500 и 300 динари по єдней, а пориви за продукцию конзумней риби 10 динари за кґ випродукованей риби. За єдну кошнїцу пчоларе годни достац 600 динари.
За реґресованє премиї осиґураня за шаца, плоди, вецейрочни засади, розсаднїки и животинї наменєни 450 милиони динари. Директни плаценя за стимулациї польопривреднїком вєдно виноша 16,9 милиярди динари, з того 3,4 милиярди за основни стимули за рошлїнску продукцию, за реґрес за штучни гной 3,5 милиярди, а за реґрес за трошки лаґерованя 500 000 динари.
За орґанску продукцию того року видвоєни 92 милиони динари, а за очуванє рошлїнских и животиньских ґенетичних ресурсох 58 милиони динари.
За унапредзенє економских активносцох на валалє, през потримовку нєпольопривредним активносцом наменєни 15 милиони динари, а за додаванє вредносцох польопривредним продуктом, уводзенє и сертификацию системох безпечносци и квалитету поживи, орґанских продуктох и продуктох з ознаку ґеоґрафского походзеня 10 милиони динари.
За кредитну потримовку у польопривреди обезпечени 600 милиони динари, а за окремни стимулациї коло 232 милиони.