НОВИ САД – Приходи до покраїнского буджету прешлого року були 54,808 милиярди динари, а з пренєшенима средствами зоз скорейших рокох 60,677 милиярди, цо 100,13 одсто у одношеню на плановани буджет, поведзене стреду на схадзки Покраїнскей влади, кеди утвердзени Предлог покраїнскей скупштинскей одлуки о закончуюцим буджету АПВ за 2015. рок.
Жридлово приходи и приманя творели 6,42 одсто буджету, уступени приходи 30,05 одсто, а найвекша часц буджету були трансферни средства – 63,53 одсто. Закончуюци рахунок буджету АПВ за 2015. рок то консолидация закончуюцих рахункох 24-ох директних буджетних хасновательох, 20 индиректних хасновательох и 6 буджетних фондох.
Средства з буджету вихасновани за витворйованє 188 програмних активносцох и 86 проєктох.
Покраїнска влада на схадзки принєсла и одлуки о чишлє буджетних студентох на перших рокох на високих фахових школох и факултетох хтори у составе Универзитету у Новим Садзе.
На основни фахово студиї на високих школох на перши рок о трошку Покраїни можу ше уписац 1 075 студенти. На перши рок на основних фахових, академских и интеґрованих студийох на факултетох новосадского Универзитету на трошок АПВ можу ше уписац 5 260 будуци студенти.
На перши рок мастер академских студийох и докторских академских студийох можу уписац 2 918 студенти хтори буду на буджету.