РУСКИ КЕРЕСТУР – Всоботу, 26. децембра отримани други нєформални сход студентох физики, дипломованих физичарох и докторох у тей обласци з Руского Керестура.
Сход орґанизовал др Йоаким Стрибер з Беоґраду, котри ше занїма з ласерами и їх применьованьом, а з тей нагоди отримал и кратку презентацию о ласерскому чисценю рижних материйох, як цо то камень, метал, папер, прикраски, та чисценю професийних малюнкох.
Понеже од першого сходу дзепоєдни дипломовали, докторовали, пременєли роботне место, то була и причина за орґанизованє другого такого стретнуца и друженя.
Попри Стрибера, на сходзе бул и длугорочни професор физики у керестурскей Школи „Петро Кузмяк” Йовґен Медєши, докторе Ясна Папуґа и Ґерґей Шоти, котри жию и робя у Белґиї, та студенти физики Кристина Сабадош и Мирко Папуґа.
