НОВИ САД – Представителє Городу Нового Саду, вецей орґанизацийох, институцийох, подприємствох, установох и здруженьох, всоботу 13. юния, подписали Грамоту о сотруднїцтве у отримованю „Велького кола за Ґиниса”, з чим тей манифестациї дата широка потримовка.
Грамота о сотруднїцтве у орґанизованю найвекшого кола на швеце, у хторим на новосадских булеварох и улїцох наступя танєчнїки з 275 културно-уметнїцких дружтвох, односно вецей як 11 000 учашнїки, подписана на шветочносци у аули Новосадского сайму, а подписованє провадзела богата културно-уметнїцка програма.
Директор Здруженя „Вельке коло” Милан Веселинович подзековал на велькей потримовки и оценєл же манифестация хтора би мала войсц до Ґинисовей кнїжки рекордох вельке збуванє нє лєм за Нови Сад, алє и за цалу Сербию.
Манифестация будзе и гуманитарного характеру, понеже єдно з єй порученьох будзе и подзвигованє свидомосци гражданох о борби процив диябетесу, гварел Веселинович и наглашел же „Вельке коло за Ґиниса” пошлє до швета красну слику о Сербиї.
Руски Културни Центер єдно з перших здруженьох хторе ше одволало на поволанку за участвованє на тей манифестациї, а ма и длугорочне одличне сотруднїцтво зоз Здруженьом „Вельке коло”.
