ШИД/ДЮРДЬОВ – Кладзански народни театер „КЛЮД” з Кладзанох, зоз Словацкей, всоботу, 18. априла у сали Културно-образовного центру у Шидзе виведол представу „Кабаре Виходняр”, хтору обдумал и режирал Йошко Єнчо.
Як пародию на каждодньови живот у восточней Словацкей, „КЛЮД” з вецей франтовлївима драмскима сличками добре нашмеял публику, хтора уживала у єдногодзиновим гумору и ґлумцох наградзовала з аплаузами на отвореней сцени.
Под час пребуваня у Шидзе госци були змесцени у Лєтнєй владическей резиденциї, а домашнї им було Културно-просвитне дружтво „Дюра Киш”. Госци з Кладазнох нащивели и Ґалерию малюнкох „Сава Шуманович-институцию култури од националного значеня” и Музей наївней уметносци „Илиянум”.
Вчера, 19. априла, исту представу, хтора нєпреривно виволовала шмих и щири аплаузи публики, Кладзанчанє одбавели и у Дюрдьове, у просторийох КУД „Тарас Шевченко”, а друженє з госцами предлужене и по представи.
Театер з Кладзанох и прешлого року у априлу госцовал у Шидзе и Дюрдьове.
