РУСКИ КЕРЕСТУР – Матурани руского оддзелєню Ґимназиї „Петро Кузмяк” вчера участвовали у тренинґу з меном „Активне глєданє роботи”, хтори им отримали волонтерки Дияна Країнович и Ванеса Медєши.
Як виявели за Рутенпрес, з тренинґом младим понукнути потребни информациї о тим як ше глєда роботу, цо то тарґовище роботи, як зложиц свою биоґрафию и провадзаце писмо и на концу – яки їх права и обовязки у процесу роботи.
Волонтерки Країновичова, абсолвентка на Факултету политичних наукох, а Медєшова на Одсеку за руски язик, вєдно з другима нєдавно закончели сертификовану обуку за тоту едукацию о обезпечованю роботи за младих у Войводини.
Обуку орґанизовала нєвладова орґанизация Граждански фонд „Панония”, з потримовку Покраїнского секретарияту за спорт и младеж, а обуку закончели млади припаднїки националних меншинох. Ванеса Медєши на обуки була спред Одбору за образованє Националного совиту Руснацох.
На тренинґу у керестурскей Школи зоз школярами участвовали и їх професорки Каролина Папуґа и Люпка Малацко. Подобни тренинґ дзень пред тим отримани у Алибунару за младих Румунох, а у планє тренинґи и за припаднїкох других националних заєднїцох.
