КУЛА – Понеже виберанково активносци за наступни и локални виберанки почали 7. марца, Општинска управа Кула информує гражданох же можу окончиц увид до виберацкого списку.
Увид до виберацкого списку мож окончиц електронски, на службеним боку Министерства державней управи и локалней самоуправи (www.mduls.gov.rs) з уношеньом єдинственого матичного числа, як и прейґ СМС поруки на телефон хтори тиж будзе обявени на сайту Министерства.
Гражданє можу глєдац уписованє, сцеранє, вименку, дополнєнє, лєбо виправку своїх податкох у виберацким списку, а на териториї кулскей општини то мож поробиц у месних канцеларийох (у матичара) у местох општини, а Кулянци у Услужним центре.
У Руским Керестуре увид, односно даяки пременки у виберацким списку, у Месней канцелариї мож окончиц стреду и штварток од 7 до 15 годзин.
Єдинствени виберацки список будзе заключени 8. априла до 24 годзин.