СУБОТИЦА – У просторийох Дружтва Руснацох у Суботици штварток, 29. октобра вечар було окреме весело, понеже домашнї орґанизовали друженє за штредньошколцох и студентох з рижних наших местох котри на школованю у Суботици.
Друженє орґанизоване же би ше млади упознали медзи собу, алє и з роботу Дружтва Руснацох, дознали дзе ше находза просториї Дружтва и дали идеї за дзепоєдни нови програми и друженя.
Попри младих з наших местох, на друженю присуствовали и млади котри жию и робя у Суботици, як други члени Дружтва.
Госцох и присутних привитал предсидатель Дружтва Руснацох у Суботици Иван Гарди, а за добре розположенє ше з гармонику и шпиваньом постарал Кристиян Няради з Руского Керестура, так же ше и пошпивало и затанцовало.Найвецей ше шпивало нашо стари, алє и нови руски шпиванки, популарни при младих.
Домашнї госцом порихтали ошвиженє и закуску и порадзене же би ше таки друженя отримовало честейше. Орґанизацию того вечара финансийно потримало Роботне цело за младеж Националного совиту Руснацох.