КУЛА – Националне швето Руснацох у Кули означене вчера на 13 годзин у просторийох Руского КУД „Др Гавриїл Костельник”.
На початку програми Мишана жридлова ґрупа Дружтва одшпивала гимну Сербиї „Боже правде” и нашу шветочну шпиванку „Браца Русини”, под руководительством Еуфемиї Планкош, а госцох и домашнїх привитал предсидатель кулского Дружтва Владимир Бучко. Винчуюци нашо швето, Бучко медзи иншим наглашел:
– Можеме буц горди пре шицко цо посцигли нашо предки, алє мушиме буц и подзековни людзом з котрима жиєме, же нам помогли зачувац наш национални идентитет. Най бизме и далєй жили у злагоди медзи собу и з другима народами. Най би наша заєднїца цо вецей укладала до знаня и науки, бо лєм так можеме постац ровноправни члени нашого и шветового штредку – гварел Владимир Бучко.
Школярки котри у Кули ходза на пестованє руского язика Лара Сопка, Мария и Наталия Жирошово рецитовали писнї Гавриїла Костельника, а Лїляна Кнежевич писню Любици Рамач. Пририхтали их Мария Стрибер и Амалия Ковач, а на концу пригодней програми Жридлова ґрупа одшпивала писню „Хижочко стара”.
На означованю швета у Кули присуствовал и предсидатель Националного совиту Руснацох Славко Рац, предсидатель Рускей матки Сербиї Дюра Папуґа, священїки грекокатолїцкей парохиї св. Йосафата у Кули – парох о. Виталий Лотоцки и капелан о. Платон Салак ЧСВВ, представителє кулских КУД-ох и Месних заєднїцох.
Идуцого року Централна преслава Дня Руснацох будзе отримана у Кули.
