РУСКИ КЕРЕСТУР – Гоч ше обчековало же жатва ярцу будзе закончена ище прешлого викенду, пре нєвигодну хвилю кошенє будзе тирвац до конца тижня. Як дознава Рутенпрес, урожай досц добри и виноши од 3,5 до 4 тони по гектаре, а влага тиж одвитуюца – коло 13,5 одсто.
У одношеню на други житарки, у Керестуре нєт вельки поверхносци под статковим и пивским ярцом, а малочислени продукователє ярец на велько можу предац до трох подприємствох – „Аґрохома”, „Юарбис” и „Аґрокерестур”.
У валалє за тераз „Аґрохома” и „Юарбис” даваю аконтну цену од 16 динари, а цена ярцу на тарґовищу житаркох, та и на керестурским, будзе позната тих дньох.
После ярцу шлїдзи косидба жита, та кед хвиля дошлєбодзи, почнє идуцого тижня.