НОВИ САД – Покраїнски секретарият за польопривреду, водопривреду и лєсарство стреду, 26. октобра, уручел контракти хасновательом безповратних средствох у рамикох конкурсу за софинансованє набавки опреми за наводньованє и вибудов експлоатацийних студньох, а медзи нїма и дзешецерим Керестурцом, дознава Рутенпрес.
За тоту намену Покраїнски секретарият за польопривреду, водопривреду и лєсарство видвоєл коло 56 милиони динари. З нагоди уручованя контрактох, ресорни секретар Вук Радоєвич гварел же з тим пенєжом оможлївене наводньовац ище 1 134 гектари, а наглашел же конкурс отворени до конца октобра.
На тот конкурс ше дотераз приявели 870 физични и правни особи котри маю реґистроване польопривредне ґаздовство, медзи нїма найвецей заградкаре и овоцаре, а найвецей з општинох Рума, Нови Сад, Бачка Паланка, Кула и Оджак.
За цали 2016. рок за вибудов експлоатацийних студньох и набавку опреми за нїх, пумпох за наводньованє, системи за наводньованє, фертириґацию, тифони, линиї за наводньованє и вибудов цивоводу наменєни вєдно 330 милиони динари.