ЗАҐРЕБ/ТОМПОВЦИ (ГОРВАТСКА) – У Заґребе 17. юния подпредсидатель Влади и министер реґионалного розвою и фондох ЕУ Бранко Ґрчич представительом општинох Томповци и Ловас додзелєл награди и припознаня за Проєкт наводньованя ИРРИ, хтори преглашени за найуспишнєйши проєкт у локалних управох и самоуправох хтори соуфинансовани зоз средствох Европскей униї у периодзе од 2012. по 2014. рок у Вуковарско-сримскей жупаниї. У проєкту конкретно участвовал и заградкар Желько Лїкар з Миклошевцох (Општина Томповци).
У мено Општини Томповци награду приял началнїк Томислав Паненич, а у мено Општини Ловас началнїца Таня Паша.
Найуспишнєйши Проєкт наводньованя ИРРИ коштал прейґ 240 000 тисячи еври, як прейґгранїчни проєкт медзи Горватску и Босну и Герцеґовину, а запровадзовани є од децембра 2012. по юний 2014. року.
За тот час на 13 демострацийних польох на подручу сушедних општинох Ловас и Томповци поставена опрема за наводньованє, апарати за контролованє влаги у жеми як и аґрометеоролоґийна станїца. Виробена и студия о терашнїм стану у наводньованю и його реґистер у Вуковарско-сримскей жупаниї, а едуковани и 25 технїчаре у наводньованю.
Медзи учашнїками и хаснователями средствох Европскей униї и ґаздовство Желька Лїкара з Миклошевцох, дзе запровадзена цалосна система наводньованя, зоз студнї глїбокей коло 75 метери.
