ДЮРДЬОВ – Внєдзелю вечар, на Перши дзень Велькей ноци, у полней сали Дому култури у Дюрдьове, КУД „Тарас Шевченко” отримало традицийни рочни Вельконоцни концерт. Присутних привитал предсидатель Скупштини Дружтва Мирослав Чакан, котри визначел же Дружтво у тим року означує 70-рочнїцу снованя и же ше шицки члени уж пририхтую за означованє ювилею, як и за участвованя на манифестацийох, концертох, фестивалох и госцованя у нас и иножемстве.
У двогодзиновей богатей програми, з вецей як 20 точками участвовали шицки секциї Дружтва у хторих рижни ґенерациї – од наймладших з дзецинскей заградки, по найстарших членох дюрдьовского КУД. Коло два трецини програми творели нови шпиванки, рецитациї, танци, музични точки, хтори були попреплєтани з франтовлїву конферансу.
Участвовали соло-шпиваче, Дзивоцка шпивацка ґрупа и Жридлова хлопска шпивацка ґрупа, Вельки тамбурови оркестер, члени Рецитаторскей и Драмскей секция, як и Дзецинскей, Пририхтуюцей и Виводзацкей ґрупи Фолклорней секциї. За концерт и тогорочну сезону пририхтали их уметнїцки руководителє Михал Лїкар, Сенка Станкович, Яким Гарди, Саня и Микола Хромиш, Блаженка Тимко Станкович, Марина Сабадош, Тамара Салак, Мария Хромиш и Мария Самарджич. Попри Управного одбору, членох и особох котри потримую роботу Дружтва, у орґанизациї Концерту участвовала и Младежска орґанизация.
Концерт провадзели и владика Георгий Джуджар, заменїк предсидателя Националного совиту (НС) Руснацох Йовґен Мудри, предсидатель Вивершного одбору НС Желько Ковач, члени НС Руснацох, дюрдьовски парох о. Йоаким Холошняй, о. Борис Холошняй зоз Швайцарскей, директорка НВУ „Руске Слово” Мартица Тамаш, предсидателька Совиту Месней заєднїци Дюрдьов Леона Виславски, директорка дюрдьовскей ОШ Мария Тртич, члени Совиту Месней заєднїци, Церковного одбру и други.
Отримованє Концерту помогли Покраїнски секретарият за културу и явне информованє, Покраїнски секретарият за образованє, предписаня, национални меншини-заєднїци, Национални Совит Руснацох, Завод за културу войводянских Руснацох и Општина Жабель.
