ЗОМБОР – После 44-ох рокох нєпреривней роботи, пондзелок, 2. новембра, три днї пред остатнїм термином за оглашованє його предаваня, цалком уцихли габи Радио Зомбору. Емитованє престало понеже Радию виключена струя пре вельке длуство.
Як пише новосадски „Дневник”, Радио Зомбор би и так бул загашени, понеже Аґенция за приватизацию нє мала намиру понукнуц го на предай. Длуства фирми од коло 5 милиони динари вельо векши як єй оценєна вредносц, так же вироятно пойдзе до предликвидациї и будзе загашени.
Радио Зомбор, як остатнї явни медий у Заходнобачким округу, од снованя програму емитовал на сербским и мадярским язику, а остатнї 10 роки и на язикой меншинох котри жию у зомборскей и сушедних општинох – по горватски, бунєвски, єден час и по ромски. Прешол и єдну приватизацию 2007. року, хтора була понїщена.
Радио Зомбор напущели коло 20 заняти, а терашнї шесцеро котри остали чекаю же би им Министерство за роботу одобрело социялну програму, за хтору ше вияшнєли.
Гражданох у Зомборе и општини тераз информую єден приватни локални радио, два кабловски ТВ, писани медий по сербски „Зомборски новини” и тижньовнїк по мадярски „Дунатай”, хтори до конца рока можебуц будзе загашени.