ВЕРБАС – Кампаня цаганя и преробку цукровей цвикли у полним розмаху, чому доприноши и вигодна хвиля за тоту роботу, а як гваря фаховци, урожаї и диґестия добри – тераз коло 60 тони, алє понеже перше на шоре подлєйша, штреднї урожай сиґурно будзе векши.
Диґестия цвикли 15 и вецей одсто, нєчистоти коло 13, та як гваря у Вербаше, парасти задовольни и уж тераз за вербаску цукровню законтрачени 2 000 гектари за нарок.
Кампаня у вербаскей Фабрики цукру тирва уж 43. дзень и дотераз обробени коло 30 одсто поверхносци на хторих законтрачена цвикла за вербаску цукровню. Фабрика ма законтрачени 19 800 гектари, алє єй припадли и 2 700 гектари законтрачени за фабрику у Сенти, хтора заварта, та планує випродуковац милион 400 000 тони цвикли.
Фабрика на дзень прерабя 7 000 тони цвикли, план преробиц 900 000 тони, а остаток ше пошлє до цукровньох у Печинцох и Ковачици.