РУСКИ КЕРЕСТУР – У Руским Керестуре вчера и завчером, кед у цалей жеми були найгоруцейши днї, у керестурским водоводу нє зазначене звекшане трошенє води, хторе тераз дньово 800-900 кубики – дознава Рутенпрес од директора ЯКП „Руском” Иґора Фейдия.
По його словох, трошенє води у валалє тих дньох порядне и прето же Керестурци загради залїваю з власних студньох, а велї тераз анґажовани у косидби и на других роботох на полю, та найвекше трошенє води, до 1 080 кубики дньово, призначене у маю и обчекую у авґусту.
У керестурским водоводу нєт проблеми у подмирйованю з воду, понеже з пейцох студньох тераз робя штири, а єдна з нїх лєм з половку капацитету, бо за вецей нєт потреби, гварел Фейди.