У Керестуре нєшка Вельки пияток

автор м. афич
367 Опатрене

РУСКИ КЕРЕСТУР – У рускокерестурскей парохиї св. оца Миколая нєшка Вельки пияток зоз хторим вирни означую здогадованє на дзень страданя Исуса Христа и його розпинаня.

У катедралним храме нєшка на 8 годзин Утриня з читаньом 12 страсних євангелийох праве о тих подїйох, а пополадню на 15 годзин Вечурня и хованє Исуса Христа зоз покладаньом плащанїци до гробу. То єдини дзень у року кед ше дзвони нє оглашую, єдино ше под час Хованя оглашує „керепкадло”.

Вирни потим можу присц до церкви помодлїц ше при Христовому гробу, як и цали дзень през Вельку соботу. После Хованя пред Божим гробом нєшка почина и Дзевятнїца до Божого милосердия.

На Вельки пияток строги пост у єдзеню, того дня ше нє роби чежки роботи, алє ше го препровадзує у цихосци и молитви, а ґаздинї по обичаю фарбя писанки.

На Вельку соботу на 8 годзин будзе Єрусалимска утриня, а на 20 Пасхалне бдиниє – Всеночне з воскресну утриню. Векшину богослуженьох будзе предводзиц наш преосвящени владика Георгий з домашнїма священїками.

ПОВЯЗАНИ ТЕКСТИ