РУСКИ КЕРЕСТУР – Дзецинска ґрупа Драмского студия АРТ Дому култури Руски Керестур вчера вечар успишно премиєрно обавела свою нову представу – „Васо Пикасо” Саву Шкобича, у режиї Ксениї Бодянец.
Тема представи вше присутне неґативне зявенє зоз школского живота старших школярох – одправянє, односно сцеканє з годзинох, дзе главна особа „Васо”, з назвиском „Пикасо”, надумал нє пойсц до школи кед бул контолни з математики. При тим ше запутал до циґанства, алє научел и добру животну лекцию.
Шейсцчлену ґлумецку екипу творя Емилиян Няради, Ана Костелник, Петрик Надь, Ивана Планчак, Андрей Надь и Анамария Няради.
Режисерка Бодянцова обдумала и сценоґрафию, текст Сави Шкобича на руски язик преложел Владимир Бодянец, костими пририхтала Таня Орос, суфлерка Сара Планчак, музични сотруднїк и тон-майстор Михайло Бодянец, а майстор шветла Сашо Палєнкаш.
Друге виводзенє представи „Васо Пикасо” будзе уж 5. априла на Општинскей смотри дзецинскей театралней творчосци, у Крущичу.