КОЦУР – З нагоди Националного швета Руснацох у Коцуре вчера ортримана ище єдна програма, у орґанизациї Роботней єдинки Коцур Културного центру Вербас, Коцурского здруженя младих, Културно-просвитного дружтва „ДОК”, Етно-клубу „Одняте од забуца” и Месного одбору Рускей матки.
Програма отримана у Велькей сали Дому култури, присутних Коцурцох и госцох привитал предсидатель КПД „ДОК” проф. др Михайло Фейса, котри пречитал и реферат о присельованю Руснацох до тих крайох, як и о терашнїм стану рускей националней меншини.
Поему Мирона Будинского рецитовала Мария Горняк, а потим одбавена театрална представа „Нинджа у тензиї 2”, автора и режисера Иґора Пушкаша, у хторей участвую Катарина и Давид Кулич, та сам Иґор Пушкаш.
На вчерайшей програми присуствовали предсидатель Рускей матки Дюра Папуґа, директорка ОШ „Братство-єдинство” Славица Байор, як и представителє месних здруженьох, а по програми орґанизовани коктел.