КОЦУР – По длугшей павзи, у Коцуре знова мож патриц проєкциї найновших филмох у биоскопе, дзекуюци Културному центру Вербас и вербаскому Биоскопу „Югославия”. Дотераз приказовани лєм рисовани филми за дзеци, а прешлого тижня перши раз давани и порядни бавени филм.
Проєкциї бавених филмох буду пондзелок на 19 годзин, док дзецински филми годно патриц раз мешачно, дополадня. Уходнїца 100 динари.
Як за Рутенпрес виявела орґанизаторка културних активносцох Дому култури у Коцуре Моника Гарди, о терминох проєкцийох ше годно поинформовац прейґ плакатох, хтори поряднє буду викладани на огласней табли Дому култури, як и по интернету.